Ужо амаль 3 гады Валерыю Касьцюгову ўтрымліваюць у жаночай калёніі №4 у Гомлі. Крыніца, дасьведчаная ў справах Валерыі Касьцюговай, паведамляе пра яе найперш тое, што ў яе пагаршаецца здароўе.
«Здароўе ў яе дрэннае і яно ўвесь час пагаршаецца. У яе гіпатэрыёз [паніжаны ўзровень гармонаў шчытавіцы], але праблема, што туды не пускаюць добрыя лекі, толькі беларускія аналягі. Таму гэта прыкметна адлюстроўваецца на яе стане: слабасьць, хутка стамляецца, дрэнная тэрмарэгуляцыя, праз што бывае, што падае непрытомная, на сонцы ці асабліва калі фізычная праца», – распавяла крыніца.
Паводле крыніцы, незадоўга да ўвязьненьня ў Валерыі Касьцюговай узьніклі праблемы з наднырачнікам, і цяпер ёсьць патрэба ў трывалым наглядзе дактароў.
«Ёй увесь час патрэбен асаблівы догляд, дыета, а гэта ўсё таксама не ўлічваецца. Аблегчаннага рэжыму працы ёй не даюць. Таксама ўплывае на пагаршэньне здароўя якасьць ежы, недахоп сну і адпачынку. Плюс псыхалагічны стан», — патлумачыла крыніца.
Пры гэтым, паводле крыніцы, пэўную мэдычную дапамогу Валерыя Касьцюгова ў мэдычнай частцы калёніі атрымлівае. Гэтак, нядаўна яна пабывала ў стаматоляга і ў выніку была задаволеная дапамогай.
«Яна працягвае працаваць швачкай. Вядома ж, стамляецца, бо праца цяжкая, а сіл у яе няшмат, але не скардзіцца, трымаецца», — апавяла крыніца.
Валерыя Касьцюгова была затрыманая 30 чэрвеня 2021 году ў сваёй кватэры. Пасьля працяглага вобшуку, які праводзілі супрацоўнікі КДБ, яе зьмясьцілі ў ізалятар часовага ўтрыманьня на Акрэсьціна, адкуль перавялі на «Валадарку». Толькі праз паўтара года пачаўся судовы працэс, на якім Валерыю Касьцюгову прызналі вінаватай паводле трох артыкулаў Крымінальнага кодэксу: ч. 1 арт. 357 («дапамога дзеяньням, учыненым з мэтай захопу ўлады»), ч. 3 арт. 361 («заклікі да дзеяньняў, накіраваных на прычыненьне шкоды нацыянальнай бясьпецы») і ч. 3 арт. 130 («распальваньне іншай сацыяльнай варожасьці»).
17 сакавіка 2023 г. Валерыю Касцюгову і яе калегу па экспэртнай супольнасьці Тацьцяну Кузіну асудзілі кожную да дзесяці гадоў зьняволеньня ў калёніі ва ўмовах агульнага рэжыму.
Валерыі Касьцюговай 57 гадоў, яна вядомы ў Беларусі палітоляг, заснавальніца і рэдактарка сайта экспэртнай супольнасьці «Наше мнение», рэдактарка і аўтарка «Беларускага штогодніка» і кіраўніца групы экспэртаў маніторынгу «Беларусь у фокусе».
Форум