Пасьля завершаньня саміту Эўразійскага эканамічнага саюзу ў Менску Ўладзімір Пуцін правёў асобную прэсавую канфэрэнцыю без удзелу Аляксандра Лукашэнкі і не сустрэўся зь ім нават асабіста. Палітычны аглядальнік Свабоды Валер Карбалевіч аналізуе, што гэта ўсё значыць.
Беларусь сёлета старшынюе ў Эўразійскім эканамічным саюзе, таму саміт і форум праходзілі у Менску. Але замест рэальнай палітыкі — пампэзнае мерапрыемства, дзе зьбіраецца мноства чыноўнікаў з краін-чальцоў саюза, якія шмат разважаюць пра карыснасьць згаданага аб’яднаньня.