Як адзначаецца ў афіцыйным паведамленьні, законапраект прадугледжвае шэраг навацыяў.
«Для выключэньня рызыкаў, зьвязаных з дэструктыўнай і фінансаванай з-за мяжы дзейнасьцю, прадугледжваецца накіраваньне запытаў у дзяржаўны орган, упаўнаважаны ажыцьцяўляць захады папярэджаньня і выяўленьня пагрозаў нацыянальнай бясьпецы, аб наяўнасьці (адсутнасьці) інфармацыі аб тым, што дзейнасьць уласьніка маёмасьці прыватнай установы, заснавальнікаў асацыяцыі (саюзу), якія падалі дакумэнты для дзяржаўнай рэгістрацыі гэтых суб’ектаў гаспадараньня, стварае пагрозу нацыянальнай бясьпецы. У выпадку пазытыўнага адказу на запыт орган рэгістрацыі будзе адмаўляць у дзяржаўнай рэгістрацыі суб’екту гаспадараньня», — паведамілі ў Палаце прадстаўнікоў.
Сярод іншых зьменаў — скарачэньне з 5 да 3 дзён тэрміну наданьня платнай інфармацыі з Адзінага дзяржаўнага рэестру, узмацненьне патрабаваньняў да вэрыфікацыі і актуалізацыі інфармацыі аб суб’ектах гаспадараньня, у тым ліку аб бэнэфіцыярнай уласнасьці.
Згодна з праектам закону, адміністрацыі свабодных эканамічных зонаў страцілі права рэгістраваць юрыдычныя асобы — гэтым будуць займацца органы рэгістрацыі на месцы разьмяшчэньня прадпрыемстваў ці арганізацыяў.
Апроч таго, замацоўваецца норма, якая прадугледжвае абавязковую дэклярацыю адрасу электроннай пошты і інфармаваньне органаў рэгістрацыі пры яго зьмене, а таксама магчымасьць судовай забароны на ўхваленьне рашэньня аб ліквідацыі юрыдычнай асобы і павелічэньне з 2 да 3 месяцаў тэрміну прыпыненьня крэдыторам працэдуры ліквідацыі.
ГЛЯДЗІЦЕ ТАКСАМА: У Беларусі асуджаным за «экстрэмізм» забароняць займацца пэдагагічнай дзейнасьцю