Ведамства паведаміла, што прычынай рашэньня сталі «мэтанакіраваныя дзеяньні расейскіх праваахоўнікаў супраць азэрбайджанцаў па этнічнай прыкмеце» у Екацярынбурзе.
Адмене падлягаюць канцэрты, фэстывалі, выставы, спэктаклі і іншыя праграмы. Уладальнікі білетаў змогуць аформіць вяртаньне.
На фоне абвастрэньня парлямэнцкая дэлегацыя Азэрбайджана вырашыла не ўдзельнічаць у пасяджэньні камісіі Мілі мэджліса рэспублікі і Фэдэральнага сходу Расеі па міжпарлямэнцкім супрацоўніцтве.
У заяве парлямэнта ўказваецца, што прычынай сталі «дэманстратыўныя і незаконныя дзеяньні» супрацоўнікаў расейскіх праваахоўных органаў, якія прывялі да ахвяр сярод азэрбайджанцаў.
Адносіны паміж Азэрбайджанам і Расеяй абвастрыліся пасьля таго, як 27 чэрвеня ў Екацярынбурзе былі затрыманы больш як 50 чалавек азэрбайджанскага паходжаньня. Загінулі два чалавекі. Яшчэ двое атрымалі падчас рэйду сур’ёзныя раненьні. Баку запатрабаваў прыцягнуць вінаватых да адказнасьці.
Расейская абшчына Азэрбайджана асудзіла дзеяньні расейскага боку і заклікала да абʼектыўнага расьсьледаваньня здарэньня ў Екацярынбурзе.
МЗС Расеі заявіла, што затрыманьні праводзіліся ў рамках расьсьледаваньня цяжкіх злачынстваў, а сытуацыя знаходзіцца пад кантролем. Прадстаўнік МЗС Марыя Захарава ўдакладніла, што размова ідзе аб справах, зьвязаных з забойствамі, учыненымі ў 2001, 2010 і 2011 гадах.
Форум