Як гаворыцца ў паведамленьні ведамства, 27 чэрвеня расейскія паліцэйскія правялі рэйды, «падчас якіх былі жорстка забіты два азэрбайджанцы, некалькі чалавек атрымалі цяжкія цялесныя пашкоджаньні, дзевяць чалавек арыштаваны».
«Было даведзена наша чаканьне расьсьледаваньня пытаньня, хуткага прыцягненьня да крымінальнай адказнасьці ўсіх асобаў, якія ўчынілі гвалт», — сказана ў прэс-рэлізе зьнешнепалітычнага ведамства.
Прадстаўнік МЗС Расеі Марыя Захарава паведаміла, што затрыманьні ў Екацярынбурзе праводзіліся ў рамках крымінальных спраў. Дыпляматка ўдакладніла, што падазроныя зьяўляюцца грамадзянамі Расеі.
Запрошаны 28 чэрвеня ў МЗС Азербайджана Валакавых даў неабходныя тлумачэньні азэрбайджанскаму боку і запэўніў, што сытуацыя знаходзіцца пад кантролем праваахоўных органаў, адзначыла Захарава.
У прэс-службах рэгіянальнага СУ СК і ГУ МУС па Сьвярдлоўскай вобласьці РБК паведамілі аб «правядзеньні комплексу мерапрыемстваў у рамках расьсьледаваньня крымінальных спраў аб злачынствах мінулых гадоў». У падазраваных прайшлі ператрусы.
Расейскае выданьне Е1 піша, што ў пятніцу ў Екацярынбурзе былі затрыманыя каля 50 азэрбайджанцаў. Адзін чалавек памёр, калі да яго ўварваліся паліцыянты.
«Яму стала дрэнна, ён схапіўся за сэрца. Выклікалі хуткую, аказалі дапамогу, спрабавалі адпампаваць, але выратаваць не ўдалося. Ён ужо немалады быў», — расказаў выданьню знаёмы загінулага.
Па дадзеных Е1, загінулы быў адным з братоў Сафаравых, якія зьяўляюцца ўладальнікамі кавярні «Каспій». Сьцьвярджаецца, што іх падазраюць у забойстве прадпрымальніка, якое адбылося ў маі 2001 года каля кафэ. Тады дачыненьне Сафаравых не ўдалося ўстанавіць.
Форум