Як адзначае агенцтва Reuters, ЛГБТ-прайд, які перарос масавую антыўрадавую дэманстрацыю, стаў адной з найбуйнейшых апазыцыйных акцый у краіне.
Арганізатары расказалі, што на мерапрыемства прыйшла рэкордная колькасьць людзей.Па іх ацэнках, удзел прынялі ад 180 да 200 тысяч чалавек. Сьцьвярджаецца, што на марш прыехалі людзі з 30 розных краін, у тым ліку 70 чальцоў Эўрапейскага парлямэнта.
Сярод удзельнікаў маршу былі студэнты, семʼі і жыхары сельскай мясцовасьці, якія заявілі, што ніколі раней не хадзілі на мітынгі. На адным з плякатаў, якія несьлі ўдзельнікі мерапрыемства, было напісана: «Ніхто з нас ня вольны, пакуль усё ня вольныя».
Раней у гэтым месяцы паліцыя абʼявіла, што выканае распараджэньне ўрада і забароніць шэсьце. Мэр Будапэшта Гергей Карачонь паспрабаваў абысьці закон, заявіўшы, што марш пройдзе як муніцыпальнае мерапрыемства, якое, паводле яго слоў, не патрабуе дазволу.
«На гэты раз мішэньню сталі сэксуальныя меншасьці. Мы лічым, што не павінна быць грамадзянаў першага і другога гатунку, таму мы вырашылі падтрымаць гэтае мерапрыемства», — заявіў Карачонь.
Паведамляецца, што невялікія групы ўльтраправых праціўнікаў ЛГБТ-прайду паспрабавалі сарваць шэсьце, але паліцыя разагнала іх і зьмяніла маршрут, каб пазьбегнуць якіх-небудзь сутыкненьняў.
- У сакавіку 2025 года парлямэнт Вугоршчыны ўхваліў законапраект, які забараняе праводзіць у Будапэшце штогадовы ЛГБТ-прайд. Законапраект быў прапанаваны кіруючай кааліцыяй, ён унёс папраўкі ў вугорскі закон аб сходах і забараніў праводзіць або наведваць мерапрыемствы, якія парушаюць акт аб «абароне дзяцей». Улады таксама змогуць ідэнтыфікаваць удзельнікаў гэтых мерапрыемстваў з дапамогай сыстэмы распазнаная асоб. За парушэньне закону прадугледжаны штраф.
- Урад Віктара Орбана прыняў акт аб «абароне дзяцей» у 2021 годзе. У ім гаворыцца аб неабходнасьці на дзяржаўным узроўні адстойваць традыцыйныя сямейныя каштоўнасьці і, у прыватнасьці, не дапускаць на публічным узроўні распаўсюджваньня інфармацыі аб гомасэксуальнасьці, бісэксуальнасьці і трансгендэрнасьці.
Форум